ഈ എഴുത്തുപുരയില്‍..

09 April 2018

അഹ്സന അശ്റഫ്, അൽത്താഫിനു സ്വന്തം

ചെമ്പേലവളപ്പിൽ അശ്റഫിന്റെ പ്രഥമപുത്രി അഹ്സനക്ക് മാംഗല്യം.
കക്കിടിപ്പുറം സ്വദേശി അൽത്താഫുമായുള്ള നിക്കാഹ് 2018 ഏപ്രിൽ 8 ന് ഞായറാഴ്ച കുന്നത്ത് പള്ളിയിൽ ലളിതമായി നടന്നു.

12 March 2018

അബൂബക്കർ അശ്റഫിക്ക് അറേബ്യൻ മണ്ണിൽ അന്ത്യനിദ്ര

വിനയത്തിന്റെ സൗമ്യ മുഖം അനശ്വരതയിലേയ്ക്കു മടങ്ങി.

ജീവിതം തേടിയ വിദൂര നാട്ടിൽ വിധിയുടെ പുടവ ധരിച്ച് അബൂബക്കർ അശ്റഫി ആറടി മണ്ണിൽ മറഞ്ഞു..

ഞായറാഴ്ച അന്തരിച്ച പണ്ഡിതനും സുന്നീ നേതാവുമായ നടുവട്ടം അബൂബക്കർ മുസ് ലിയാരുടെ മയ്യിത്ത് സഊദി അറേബ്യയിലെ ഹാഇലിൽ ഖബറടക്കി.

ദിവസങ്ങൾ നീണ്ട നടപടിക്രമങ്ങൾക്കു ശേഷം ഇന്ന് (മാർച്ച് 11, ഞായർ) സൗദി സമയം ഉച്ചയോടെയാണ് ജനാസ ബന്ധപ്പെട്ടവർക്ക് വിട്ടുകിട്ടിയത്. അസർ നിസ്ക്കാരാനന്തരം ബർസാലെ പള്ളിയിൽ മയ്യിത്ത് നിസ്ക്കാരം നിർവഹിച്ച് ഇന്ത്യൻ സമയം വൈകീട്ട് ഏഴ് മണിയോടെ സദ് യാൻ ഖബറിസ്ഥാനിൽ മറവു ചെയ്തു.

സ്വദേശികളുംമറുനാട്ടുകാരും
മലയാളി സംഘടനാ നേതാക്കളും പ്രവർത്തകരുമുൾപ്പടെ  നൂറുകണക്കിനാളുകൾ അന്ത്യകർമങ്ങളിൽ പങ്കെടുത്തു.

വിവിധ മത, സാമൂഹ്യ, രാഷ്ട്രീയ രംഗത്തെ വ്യക്തികളുടെയും സംഘടനകളുടെയും  ഇടപെടലുകൾ വിദേശ രാജ്യത്തെ മരണാനന്തര നടപടിക്രമങ്ങൾക്ക് താങ്ങായി മാറി.

ഐ സി എഫ്, ആർ എസ് സി നേതാക്കളായ അബ്ദുറഹ്മാൻ മദനി, ഇബ്റാഹീം സഖാഫി, ഹാരിസ് മൗലവി,  മുനീർ ബാഖവി, ഖാദർ ബാഖവി, ബഷീർ സഅദി, സലാം റഷാദി, നൗഫൽ അമാനി , അബ്ദു റഹ്മാൻ ഓമശ്ശേരി, നസീർ മുക്കം, ഷൗക്കത്ത് ചെമ്പിലോട്, അൻവർ അമാന ഇരിട്ടി, മുസ്തഫ അത്തോളി, ബഷീർ നല്ലളം, അബ്ദുലഥീഫ്‌ സാഹിബ്‌ സബാറ, യൂനുസ്‌ ആറളം, ശംസുദ്ധീൻ മുസ്‌ലിയാർ, നൗഫൽ ദാരിമി തുടങ്ങിയവരും സാമൂഹ്യ രംഗത്തെ പ്രമുഖരായ ജോൺ ഗ്ലാഡറെ മറ്റം, മൊയ്‌ദു മൊകേരി, ബഷീർ മാള, തുടങ്ങിയവരും അന്ത്യകർമങ്ങളിലും സേവന രംഗത്തും സംബന്ധിച്ചു.

പതിനഞ്ച് വർഷത്തിലേറെയായി സഊദിയിൽ ജോലി നോക്കുകയായിരുന്നു അബൂബക്കർ അശ്റഫി.
കഴിഞ്ഞ ഞായറാഴ്ച ജോലിക്കിടെ നെഞ്ചുവേദനയനുഭവപ്പെട്ടതിനെ തുടർന്ന് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ആറു മാസം മുമ്പ് നാട്ടിൽ വന്നു പോയ അദ്ദേഹം ഉടനെ വരാനിരിക്കുകയായിരുന്നു.

മലയാളി പ്രവാസിസമൂഹത്തിന്നിടയിൽ മത, സാംസ്കാരിക, വിദ്യാഭ്യാസ പ്രവർത്തനങ്ങൾക്ക് നേതൃത്വം നൽകിയിരുന്ന ഇദ്ദേഹം നാട്ടിലും മറുനാട്ടിലും സർവസ്വീകാര്യനായിരുന്നു.

അബൂബക്കർ അശ്‌റഫിയുടെ ആകസ്മിക വിയോഗത്തിൽ ഇസ് ലാമിക് കൾച്ചറൽ ഫൗണ്ടേഷൻ (ഐസിഎഫ്) സെൻട്രൽ കമ്മിറ്റി അനുശോചനം രേഖപ്പെടുത്തി. സനാഇയ്യ പ്രവിശ്യയിലെ വിവിധ സുന്നീ സംഘടനാ യൂണിറ്റുകളിൽ പരേതനു വേണ്ടി സംഘ കുടുംബം പ്രാർഥനാ മജ് ലിസുകൾ സംഘടിപ്പിച്ചു. 
സംഘടനാ ബന്ധങ്ങൾ വഴി കൂടുതൽ ആളുകളിലേയ്ക്ക് പ്രത്യേക പ്രാർഥനാ നിർദേശം നൽകുമെന്ന് ഐ സി എഫ് സിദ് യാൻ സെക്ടർ ഘടകം സെക്രട്ടറി അൻവർ സാദിഖ് കണ്ണൂർ അറിയിച്ചു.
..............................................................
ജനാസ നിസ്ക്കാരവും പ്രാർഥനാ മജ് ലിസും വെള്ളിയാഴ്ച
...............................................................
എടപ്പാൾ: അബൂബക്കർ അശ്റഫിയുടെ മയ്യിത്ത് നിസ്ക്കാരം മാർച്ച് 16ന് വെള്ളിയാഴ്ച ജുമുഅ: നിസ്ക്കാരാനന്തരം നടുവട്ടം പിലാക്കൽ മഹല്ല് പള്ളിയിൽ നടക്കും. അന്നു വൈകീട്ട് ഏഴുമണിക്ക് അബൂബക്കർ മുസ് ലിയാരുടെ വീട്ടിൽ  പ്രത്യേക പ്രാർഥനാ മജ് ലിസ് ഉണ്ടാകും. സയ്യിദന്മാരും പണ്ഡിതശേഷ്ഠരും നേതാക്കളും പ്രസ്ഥാന പ്രവർത്തകരും പങ്കെടുക്കും.
നടുവട്ടത്തെ 'നന്മ' സംഘകുടുംബത്തിന്റെ നേതൃത്വത്തിലാണ് പരിപാടി.

എല്ലാ സ്നേഹ ജനങ്ങളും പരസ്പരം അറിയിപ്പുകൾ നൽകി ആളുകളെ എത്തിക്കണമെന്നും ദുആകളിൽ പങ്കാളികളാകണമെന്നും മർഹൂം.അബൂബക്കർ അശ്റഫിയുടെ സഹോദരന്മാരായ മുഹമ്മദ് കുട്ടി മുസ് ലിയാർ, ഉമർ ഇർഫാനി, മുസ്ഥഫ മാസ്റ്റർ എന്നിവർ അഭ്യർഥിച്ചു.

-റഫീഖ് നടുവട്ടം
(11 മാർച്ച് 2018)

08 March 2018

കൊച്ചി മെട്രോയുടെ നിലവിളികൾ

പുതുക്കം തീർന്ന കല്യാണപ്പെണ്ണിന്റെ കണ്ണീരാണിപ്പോൾ കൊച്ചി മെട്രോയ്ക്ക്!

കൊട്ടിഘോഷിച്ചു കൊണ്ടാടിയ ഉദ്ഘാടനവും രാജ്യം മുഴുവൻ വീമ്പു പറഞ്ഞ വരുമാനാരവവും കഴിഞ്ഞ് പൊട്ടിക്കരച്ചിലിന്റെ വക്കിലാണ് കേരളത്തിന്റെ പ്രഥമ മെട്രോ.

വ്യവസായ നഗരത്തിൽ ശതകോടികൾ മുടക്കി സ്വപനങ്ങൾ പടുത്തുയർത്തുമ്പോൾ വികസനക്കുതിപ്പിന്റെ സംഗീകാത്മക ചൂളം വിളികൾക്കാണ് സംസ്ഥാനം കാതോർത്തതെങ്കിലും ഇപ്പോളുയരുന്നത് നിലവിളികളാണ്; നഷ്ടക്കണക്കുകളുടെ നിലവിളികൾ.

എന്തൊക്കെയായിരുന്നു പുകിലുകൾ!

മെട്രോയുടെ പേരിൽ ഭരണപക്ഷവും പ്രതിപക്ഷവും തൻപൊരിമകൾ നിരത്തിയപ്പോൾ, അവകാശവാദങ്ങളും വിവാദങ്ങളുമായി വാക്പോരുകൾ തീർത്തപ്പോൾ കോമാളിക്കൂട്ടങ്ങളായി മാറിയ രാഷ്ട്രീയ നേതാക്കളെ ട്രോളുകളിൽ തളക്കേണ്ടി വന്നു ജനപക്ഷത്തിന് !

പ്രതിദിന വരുമാനങ്ങളുടെ ലക്ഷക്കണക്കുകൾ അക്ഷരങ്ങളായി പത്രങ്ങളിൽ നിറഞ്ഞപ്പോൾ, ആഴ്ചകൾ കൊണ്ടുണ്ടായ ലാഭക്കാഴ്ചകൾ ശിൽപ്പികളെ ആശ്ചര്യപ്പെടുത്തിയപ്പോൾ മറ്റു നഗരങ്ങളിൽ കൂടി മൊട്ടിട്ടു പുതിയ മെട്രോ മോഹങ്ങൾ!

എന്നിട്ടിപ്പോൾ എന്തായി?

കൊച്ചി മെട്രോ നഷ്ടത്തിലാണെന്നാണ് വാർത്തകൾ. നിയമസഭയിൽ സർക്കാർ അവതരിപ്പിച്ച റിപ്പോർട്ടും സം'കട'ത്തിൽ നിന്ന് കരകയറ്റാനുള നിർദേശങ്ങളും ഇതു ശരിവെക്കുന്നു.

ഗതാഗതക്കുരുക്കിൽ ഗതിമുട്ടിയ കൊച്ചിക്കു വേണ്ടിയിരുന്നത് ആഢംബരങ്ങളിലും അത്യാധുനികതകളിലും ധനം മുടക്കിയ സംവിധാനങ്ങളായിരുന്നില്ല.

ആലുവയ്ക്കും കലൂരിനുമിടയിൽ യാത്ര ചെയ്യാൻ നിരവധി സർക്കാർ/സ്വകാര്യ ബസുകൾ നിരത്തിലുണ്ടായിരിക്കേ, ഇതര വാഹനങ്ങളുടെ തിരക്കും കുരുക്കുമഴിക്കാൻ മേൽപ്പാലങ്ങൾ വേണമായിരുന്നു അവിടെ.

മെട്രോയുടെ അടിസ്ഥാന സൗകര്യങ്ങൾക്കു വേണ്ടി മാത്രം പൊടിപൊടിച്ച കോടികളുടെ ചെറിയൊരു ഭാഗം മതിയായിരുന്നു നഗരത്തിലെ കുരുക്കഴിക്കാനുള്ള ചെറുപദ്ധതികൾക്ക്.

ഏതായാലും, കുത്തഴിഞ്ഞ സംവിധാനങ്ങളുടെ ബ്രാൻഡായി മാറി കുത്തുപാളയെടുത്ത
കെഎസ്ആർടിസിയുടെ ദുർഗതി പുത്തൻ യാത്രയുടെ അനുഭൂതി പകരുന്ന കൊച്ചി മെട്രോയ്ക്കും വരാതിരിക്കട്ടെ.

24 February 2018

വികസനക്കാഴ്ചകളുടെ വികലമാതൃകകൾ

ഗതാഗത യോഗ്യമാക്കിയ ഗ്രാമീണ റോഡുകളുടെ വിസ്താരത്തേക്കാൾ അധികം വലിപ്പമുണ്ട്, രാഷ്ട്രീയ പ്രസ്ഥാനങ്ങൾ ചിലയിടങ്ങളിൽ സ്ഥാപിച്ച ഫ്ലക്സ് ബോർഡുകൾ!

പ്രാദേശിക പാതകളുടേയും നാട്ടിടവഴികളുടേയും നവീകരണം തദ്ദേശസ്ഥാപനങ്ങളുടെ വലിയ ഉത്തരവാദിത്വമാണെന്നിരിക്കേ, അതു ഭരണ ശ്രദ്ധയിൽ കൊണ്ടുവരുന്നവരുടെ പടം പാർട്ടി ഭേതങ്ങളുടെ അരോചകമായ നിറച്ചാർത്തുകളിൽ വഴിയരികിൽ പ്രദർശിപ്പിക്കുന്നത് വിലകുറഞ്ഞ ഒരേർപ്പാടാണ്.

സാധ്യമാക്കിയ വികസനം ബോധ്യമുള്ള കാലത്തോളം ജനപ്രതിനിധികൾ എക്കാലവും ഭരണത്തിലേയ്ക്ക് ജയിച്ചു കയറുക തന്നെ ചെയ്യും. അതിനു അസംബന്ധങ്ങളുടെ അഭിനന്ദനക്കുറിപ്പുകളോ, ഇളിച്ചുകാട്ടുന്ന ചിത്രങ്ങളോ, കൊട്ടിഘോഷങ്ങളുടെ പിത്തലാട്ടങ്ങളോ വേണമെന്നില്ല.

വികസന ക്കാഴ്ചകളുടെ വികലമാതൃകകൾ

ഗതാഗത യോഗ്യമാക്കിയ ഗ്രാമീണ റോഡുകളുടെ വിസ്താരത്തേക്കാൾ അധികം വലിപ്പമുണ്ട്, രാഷ്ട്രീയ പ്രസ്ഥാനങ്ങൾ ചിലയിടങ്ങളിൽ സ്ഥാപിച്ച ഫ്ലക്സ് ബോർഡുകൾ!

പ്രാദേശിക പാതകളുടേയും നാട്ടിടവഴികളുടേയും നവീകരണം തദ്ദേശസ്ഥാപനങ്ങളുടെ വലിയ ഉത്തരവാദിത്വമാണെന്നിരിക്കേ, അതു ഭരണ ശ്രദ്ധയിൽ കൊണ്ടുവരുന്നവരുടെ പടം പാർട്ടി ഭേതങ്ങളുടെ അരോചകമായ നിറച്ചാർത്തുകളിൽ വഴിയരികിൽ പ്രദർശിപ്പിക്കുന്നത് വിലകുറഞ്ഞ ഒരേർപ്പാടാണ്.

സാധ്യമാക്കിയ വികസനം ബോധ്യമുള്ള കാലത്തോളം ജനപ്രതിനിധികൾ എക്കാലവും ഭരണത്തിലേയ്ക്ക് ജയിച്ചു കയറുക തന്നെ ചെയ്യും. അതിനു അസംബന്ധങ്ങളുടെ അഭിനന്ദനക്കുറിപ്പുകളോ, ഇളിച്ചുകാട്ടുന്ന ചിത്രങ്ങളോ, കൊട്ടിഘോഷങ്ങളുടെ പിത്തലാട്ടങ്ങളോ വേണമെന്നില്ല.

23 February 2018

ആദിവാസി പേരിലെ അവസരവാദങ്ങൾ

നാടുഭരിക്കുന്ന മുഖ്യന്റെ നാട്ടിൽ ഒരു പരോപകാരി പിടഞ്ഞു മരിച്ചപ്പോൾ മൗനം ദീക്ഷിച്ചവർ അട്ടപ്പാടിയിലെ മർദ്ദനമരണത്തിൽ ആത്മരോഷം കൊള്ളുന്നതും അപലപന വാക്യങ്ങളുടെ ഖണ്ഡശ പ്രസിദ്ദീകരിക്കുന്നതും മാന്യമായി പറഞ്ഞാൽ അന്തസില്ലാത്ത അവസരവാദമാണ്.

കണ്ണൂരിലേത്, പാവപ്പെട്ടവരുടെ പട്ടിണി മാറ്റാൻ ഓടി നടന്ന പച്ച മനുഷ്യനായിരുന്നു എങ്കിൽ; അട്ടപ്പാടിയിലേത് സ്വന്തം പട്ടിണി മാറ്റാൻ നാട്ടിലിറങ്ങിയ കാട്ടുമനുഷ്യനായിരുന്നു. രണ്ടു പേരും സമാധാനത്തോടെ ഭൂമിയിൽ ജീവിച്ചു തീരാൻ കൊതിച്ചു നടന്നവർ !
എന്നാൽ, അട്ടപ്പാടിയിലെ അതിക്രമം പരിഷ്കൃത സമൂഹത്തിന് യോജിച്ചതല്ലന്നും നമ്മുടെ സാംസ്കാരിക മുന്നേറ്റങ്ങളെ കളങ്കപ്പെടുത്തുന്നതുമാണന്നാന്ന് ബഹുമാന്യനായ ശ്രീ പിണറായി വിജയന്റെ വിലാപം. സഹജീവിയെ കൊല്ലാൻ മടി കാണിക്കാത്തവർ അപകടസൂചനയാണെന്ന് തോമസ് ഐസക്കിന്റെ സൈദ്ധാന്തിക വചനവും കൂടെയുണ്ട്! 

രണ്ടും മഹദ്വചനങ്ങളായി പരിഗണിച്ചാൽ ഭരണകർത്താക്കളോട് ഒന്ന് തിരിച്ചു ചോദിക്കേണ്ടി വരും: കണ്ണൂരിൽ നടന്നത് പരിഷ്കൃത സമൂഹത്തിന് യോജിച്ചതായിരുന്നോ സർ?

കേരളത്തിന്റെ സാംസ്ക്കാരിക മുന്നേറ്റങ്ങളെ അത് കളങ്കപ്പെടുത്തിയില്ലേ സർ?

എതിരാളികളെ അരിഞ്ഞു വീഴ്ത്തുന്ന അനുയായികളെ 'അപകട സൂചന 'യുടെ പുതിയ ബ്രാൻഡായി ബജറ്റിലോ വിപണിയിലോ ഉൾപ്പെടുത്താൻ വല്ല ആശയവും തലയിൽ തെളിയുന്നുണ്ടോ സർ?

18 February 2018

കട്ടപ്പുറം തറവാട്ടിലെ കണ്ടക്ടർ സർ

സ്വകാര്യക്കാരുടെ സമരം തീർന്നാൽ സർക്കാർ ബസ് ജീവനക്കാരെ ഒരാഴ്ചത്തേയ്ക്ക് 'സുഖചികിത്സ'യ്ക്ക് വിടണം.
കാരണം, കഴിഞ്ഞ മൂന്നു ദിവസമായി അവർ ശീലമില്ലാത്ത അധ്വാനത്താൽ വശംകെട്ടിരിക്കുകയാണ് ! 
തിരക്കിൽ ഞെരിഞ്ഞമർന്ന യാത്രികരെ വകഞ്ഞുമാറ്റിക്കൊണ്ടും
നിർദേശങ്ങളാൽ തൊണ്ട കീറിക്കൊണ്ടും അവർ ചെയ്ത "സേവനം" കാണേണ്ടതു തന്നെ !

കണ്ടക്ടർ എന്നെഴുതിയ സാങ്കൽപ്പിക 'സിംഹാസന'ത്തിൽ ഇരുന്ന് കൊണ്ട് മാത്രം വണ്ടി നിർത്തിക്കുകയും കയറു പിടിച്ച് വാതിലടക്കുകയും ശങ്ക നിവാരണത്തിനെന്ന പോലെ വല്ലപ്പോഴും എഴുന്നേറ് പോയി കാശ് വാങ്ങിക്കുകയും ചെയ്തിരുന്നവർ ശാരീരികാധ്വാനത്തിന്റെ 'സുഖം' ശരിക്കും അനുഭവിച്ചു, കഴിഞ്ഞ ദിനങ്ങളിൽ. 

ബാഗും ടിക്കറ്റ് യന്ത്രവും കൈയ്യിൽ പിടിക്കാനാവാതെ, പണം വാങ്ങാനാവാതെ, ബാക്കി കൊടുക്കാനാവാതെ, സന്തുലിതം പാലിച്ച് ഒരിടത്ത് നിൽക്കാനാവാതെ, ശരിക്കും വിയർത്തൊലിച്ച് വണ്ടിയുടെ ഗതിവേഗം കൂടുമ്പോൾ ആടിയുലഞ്ഞു ഒരു കണ്ടക്ടർ സർ!

" ഇതൊന്നും ശീലമില്ലല്ലോ; അനുഭവിക്കണം.. മുകളിലുള്ളൊൻ കണ്ടറിഞ്ഞു കൊടുക്കുന്നതാണ്.. "
യാത്രികരുടെ കമന്റുകൾ ഇങ്ങനെയൊക്കെ വന്നു.

ഏതായാലും, പാലക്കാട് നിന്ന് ഗുരുവായൂരിലേക്ക് പുറപ്പെട്ട ഒരു കട്ടപ്പുറം തറവാട്ടു വണ്ടി കണ്ടക്ടർ സാറിന്റെ ക്ഷീണം മാറ്റാൻ  അരമണിക്കൂറിലേറെയാണ് പട്ടാമ്പിയിൽ വെറുതെ നിറുത്തിയിട്ടത്.