തീരാ ദുരിതങ്ങളുടെ അധ്യായങ്ങൾ അടച്ചു വെച്ച്, സഹന ജീവിതത്തിന്റെ തിരശ്ശീല താഴ്ത്തി തിരുത്തിയിലെ ഉമ്മ യാത്രയായി.. ഇന്നാലില്ലാഹ്.....
കുഴഞ്ഞ ശരീരവുമായി കഴിഞ്ഞ ഇരുപത് വർഷങ്ങൾ രോഗശയ്യയിൽ കഴിഞ്ഞ ഉമ്മ, സങ്കടക്കാഴ്ചയായിരുന്നു സ്നേഹ ജനങ്ങളിൽ..
അനവധി പ്രയാസങ്ങളുടെ വിവിധ ങ്ങളായ വേദനകൾ അനുഭവിച്ച് ഈ ഉമ്മ വിധിയുടെ വീട്ടകത്ത് കിടന്നു പോയത് ഏതാനും ദിനങ്ങളായിരുന്നില്ല; രാപകലറിയാത്ത രണ്ടു പതിറ്റാണ്ടുകൾ!
ശരീരം കീഴ്പ്പെടുത്തിയ രോഗാവസ്ഥകൾ ഏറിയും കുറഞ്ഞും ആ ദുർബല മേനിയെ വേദന കൊണ്ട് നിറച്ചപ്പോൾ കൊച്ചു കുട്ടികളെ പോലെ അവർ വാവിട്ടു നിലവിളിച്ചു..
മരുന്നുകളുടെ ഫലപ്രാപ്തിയിൽ ആശ്വാസം കൊണ്ട് കണ്ണുതുറന്ന് കിടന്നപ്പോൾ അടുത്തെത്തിയവരോടെല്ലാം അവർ ആവോളം സംസാരിച്ചു..
ഓർമകൾ മറവി മൂടിയ മാതൃഹൃദയത്തിൽ തൊട്ട് ശുശ്രൂഷകളിൽ മുഴുകിയ മക്കളേയെല്ലാം 'ഉമ്മാ ' എന്നവർ മാറി വിളിച്ചു !
ശാരീരികാസ്വാസ്ഥ്യങ്ങളിൽ ഞെരിപിരി കൊള്ളുമ്പോഴും വേദനകളിൽ പുളയുമ്പോഴും അവരുടെ ചുണ്ടുകൾ ചലിച്ചു കൊണ്ടേയിരുന്നു;
പരീക്ഷണങ്ങളുടെ പേമാരി പെയ്യിക്കുന്ന റബ്ബിന്റെ ഖുർആൻ വചനങ്ങളാൽ...
ആരോഗ്യ കാലത്ത് ഹൃദിസ്ഥമാക്കിയ അദ്കാറുകളാൽ...
ഒടുവിൽ, വിട വാങ്ങിയിരിക്കുന്നു മറിയം എന്ന ആ മാതൃ മുഖം..
ആയുസ്സിന്റെ സായംസന്ധ്യയിൽ ദുരിതങ്ങൾ മാത്രം ഏറ്റുവാങ്ങിയ ആ മഹതി ഇനി ഓർമകളിൽ...
അവർ സ്വർഗലോകത്ത് സുഖാനുഭൂതികൾ ആസ്വദിക്കുന്നുണ്ടാകുമെന്ന് നമുക്ക് പ്രത്യാശിക്കാം..
അവർക്കായി നമുക്ക് പ്രാർഥനകളിൽ മുഴുകാം..
സർവാധിപാ..
ഞങ്ങളുടെ ഉമ്മയുടെ പരലോക ജീവിതം നീ പരമാനന്ദകരമാക്കേണമേ.. (ആമീൻ)
No comments:
Post a Comment