എൻറെ പ്രിയപ്പെട്ട കൂട്ടുകാരെ, ബഹുമാന്യരായ അധ്യാപകരെ...
കൊറോണക്കാലത്തിൻറെ പരീക്ഷണഘട്ടത്തിലൂടെയാണ് നമ്മൾ കടന്നുപോയിക്കൊണ്ടിരിക്കുന്നത്. ലോകത്തുള്ള മുഴുവൻ ജനങ്ങളെയും പലവിധത്തിൽ ബാധിച്ച കോവിഡ് എന്ന മഹാമാരി വിദ്യാഭ്യാസ രംഗത്തെയും അടിമുടി മാറ്റിമറിച്ചത് നമുക്ക് അറിയാവുന്നതാണല്ലോ..
വിദ്യാലയത്തിൽപോയി വിജ്ഞാനം നേടിയിരുന്ന കുട്ടികൾ വീട്ടകങ്ങളിൽ ഇരുന്ന് അറിവ്നേടുന്ന അവസ്ഥയുണ്ടായി.
ക്ലാസ് മുറികൾക്കുള്ളിലെ ബ്ലാക്ക്ബോർഡുകളിൽ നിന്നും അക്ഷരം പഠിച്ചവർ കൈകുമ്പിളിലെ മൊബൈൽസ്ക്രീനുകളിൽ നിന്ന് അറിവിൻറെ സമൃദ്ധികളിൽ ഇന്ന് ആറാടുകയാണ്…!!
ഏത് വിജ്ഞാനവും ഞൊടിയിടയിൽ വീട്ടിലെത്തുന്ന ആധുനിക സൗകര്യങ്ങൾ ഉണ്ടായതോടെ വിദ്യാർഥികൾക്ക് മുന്നിൽ കൊറോണ വൈറസ് തോറ്റു തുന്നം പാടി തിരിച്ചോടിക്കൊണ്ടിരിക്കുകയാണ്!
എന്നാൽ, വിദ്യാലയത്തിൽ പോയി കിട്ടുന്ന ആ പഠിപ്പിന്റെ സുഖം വീട്ടിനകത്ത്, വീട്ടംഗങ്ങളുടെ ബഹളങ്ങൾക്കിടയിൽ കിട്ടുന്നില്ല എന്നതാണ് സത്യം. കൂട്ടുകാരോടൊപ്പം കൂടിയും അവരോടൊപ്പം ക്ലാസ് മുറികളിൽ നിന്ന് അറിവുപകർന്നും കിട്ടിയിരുന്ന സംതൃപ്തി ഈ കോവിഡ് കാലം കൊണ്ടുവന്ന വീട്ടുതടങ്കൽ പഠനത്തിൽ ഞങ്ങൾക്ക് കിട്ടുന്നില്ല എന്നത് ഒരു പരമാർഥമായി അവശേഷിക്കുന്നു. പക്ഷേ, അതിൽ പരിഭവിച്ചിട്ടെന്തു കാര്യം? ഒരു കാര്യവുമില്ല.
ലക്ഷോപലക്ഷം മനുഷ്യരെ മരണത്തിലേക്ക് പിടിച്ചുവലിക്കുന്ന കോവിഡ് എനന മഹാമാരിയെ ഭൂമുഖത്തുനിന്നും തുടച്ചുനീക്കാനുള്ള ശ്രമങ്ങളുടെ ഭാഗമാണല്ലോ നമ്മൾ ചെയ്തുകൊണ്ടിരിക്കുന്നത്. അതിൽ പ്രധാനപ്പെട്ടതാണ് കൂട്ടംകൂടുന്ന സാഹചര്യങ്ങൾ ഒഴിവാക്കുക എന്നത്. അതിനെ അർത്ഥവത്താക്കാനാണ് സ്കൂളുകൾ അടച്ചിട്ടിരിക്കുന്നത്.
ഏതായാലും, നമ്മുടെ പ്രിയപ്പെട്ട അധ്യാപകർ എത്രമാത്രം കഷ്ടപ്പെട്ടാണ് നമുക്ക്, നമ്മുടെ വീട്ടിലേക്ക് അറിവ് എത്തിച്ചു തരുന്നത്! അവരുടെ പരിശ്രമങ്ങൾ നമ്മൾ ഉൾക്കൊള്ളേണ്ടതുണ്ട്.
ഓൺലൈൻപഠനം ആണെന്ന് കരുതി നമ്മൾ ഒരിക്കലും ഉഴപ്പി നടക്കരുത്. ശരിയായ സമയവും സന്ദർഭവും ക്രമീകരിച്ചുകൊണ്ട് നമ്മൾ പഠനത്തിൽ മുന്നേറിയേ പറ്റു... ഇനി സ്കൂൾ തുറക്കുമ്പോൾ പഴയ ക്ലാസിന്റെ മധുരവും പുതിയ ക്ലാസിന്റെ മധുരവും ചേർന്ന വിദ്യാഭ്യാസത്തിൻറെ ഇരട്ടിമധുരം നമ്മൾ തീർച്ചയായും അനുഭവിക്കും.
അതുകൊണ്ട്, എത്രയുംവേഗം സ്കൂളുകൾ തുറന്നു കിട്ടാൻ നമുക്ക് പ്രാർത്ഥിക്കാം.. അറിവ് നേടി നമുക്ക് അതുല്യരാവാം..!
ഇത്രയും പറഞ്ഞു കൊണ്ട് ഞാൻ എൻറെ പ്രസംഗം നിർത്തുന്നു.
എല്ലാവർക്കും നന്ദി.
No comments:
Post a Comment